วันพุธที่ 30 พฤศจิกายน พ.ศ. 2554

บั้นสอนโยม
       บัดนี้ ฟังเด้อพีน้องท้องถิ่นไทอีสาน
ฟังคำสอนกลอนโบราณ  หมู่อีสานให่ฟังไว้ ไทอีสานชาวบ้าน
ภูมิสถานเขตด่าน ตลอดเหมิดสู่หมู่บ้าน อีสานเซื้อหมู่เฮา
ทุกค่ำเซ้าให่คอยนั่งฟังคำสอน เถิงยามหลับยามนอนให่ฮ่ำฮอนดูบ้าง  
 ฉันจักถางทางให่   ไทอีสานได่เทียวท่อง
ต่างให่ฝูงพีน้องอีสานเซื้อได่ฮ่ำฮอน ฉันจักเว้าบอนบั้น 
 สอนญาติโยมไทอีสาน เป็นคำสอนบ่อนพระองค์ทรงต้าน    
สอนทั่งหลานเหลนหล่อน  ผัวเมียพ่อแม่
พอแต่ฮู้ฮีตเค้าธรรมพระเจ้าสั่งสอน  ตางให่หายคำฮ้อน เบาใจได่สักกะหน่อย
คือจั่งแม่น้ำน้อยๆ กินเล่นอาบเย็น  เพิ่นว่าเป็นเข็ญไข่   ให่กินยาแก้ป่วย
คันปอบมาแล่นต้อง เอาธรรมฆ่าจั่งสิหาย     
กายเฮาเศร้าอุทกังล้างสวย  เอาเด้อพ่อแม่...
อาบน้ำแล้วกายเกลี้ยงกลิ่นกะหอม          
บาดว่าใจหมองเศร้า   เอาหยังน้อเป็นน้ำอาบ
บาดกิเลสแล่นต้องเอาหยังฆ่าจั่งสิเซา      
 เพิ่นว่าใจเฮาเศร้า     ให่เอาธรรมเป็นน้ำลูป
ใจเฮาซูบเหี่ยวแห้ง เอาธรรมล้างโสรจสรง......
        บัดนี้เด้อ ฉันจักปลงธรรมให่ อุปมาคือสระใหญ่          
หากไผผู่เกิดเดือดฮ้อนให่ลงล้างอาบสี
ขอให่ยินดีน้อมนำตนเข้ามาใส่       น้อมใจมาใกล้ๆ             
 กินน้ำยอดพระธรรมเบิ่งเด้อ...
ลางฮาดีเลศล้ำสิได่ฮ่ำฮอนหา  ลางเทือเห็นกับตาสิว่าบุญนำยู้   
 ลางท่าบุญชูให่อีสานไทยสิเฮืองฮุง   
ลุงสิฮักแม่ป้า อานั้นสิฮักหลาน บ้านสิเกิดฮักบ้าน เมืองสิชอบพอเมือง  
เฟืองกับนาสิฮักกันกับกล้า   ตากับคิ้วเห็นกันสิยิกขึ้นใส่      
คนสิเป็นพีน้องใกล้ ไทยสิได่ฮักลาว     เหนียวและจ้าวสิได่อยู่นำกัน
บ่มีวันไลป๋าหางไกลคนก้ำ   เพราะว่าธรรมคุมป้อง ปองดองน้องพี   
ธรรมฮักษาผู้นั้น ธรรมป้องผู้นี้   กะดีล้วนม่วนหลาย            
หิวกะหายมาเฮาแบงให่แม่นบ่แพง        แลงและเซ้าสิเว้าม่วนนำกัน
เอกฉันสามัคคีม่วนดีแลงเซ้า    ยามกิข้าวกะชวนกันเอิ้นใส่            
 ด้วยน้ำใจเลศล้ำมีธรรมเข้าฮักษา    ลุงและป้า ปู่ ย่า อาว อา      
พากันมีศีลธรรมซำเมืองสรรค์ฟ้า    ขอให่พากันตั้งระวังใจไว้ก่อน
อย่าให่เกิดฮ้อนเดือดฮ้อน   อีสานบ้านหมู่เฮา      
เอาคำสอนพระเจ้าเป็นสิ่งประดับใจ      
อย่าสิไปหลงเพลินตั้งแต่แนวบ่เป็นก้าว   อย่าดมกาวอย่ากินเหล้า    
 เมาสุรากัญชาฝิ่น  อย่าติดเฮโรอิน  อย่าสิกินยาบ้า  กัญชาเหล้าอย่าเอา                 
 บอกสอนพวกลูกเต้าอย่าสิเกี่ยวของเมา  อย่าสิเอาของมึนมืดมัวเมาบ้า    
รอย่าสิพากันเล่นการพนันเบี้ยโบก   เล่นไหโลและไพ่รายได่นั้นบ่มี   
เล่นป่นปี้ เล่นเทียวโสเภณี   เล่นอัปปรีย์จั่งไฮเทียวไปตามซ่อง   
เล่นผิดคองโบราญเฒ่าอีสานเฮาตั้งแต่เก่า
ตกสมัยลูกเต้าหาเล่นบ่แม่นแนว   ไปเทียวแล้วโรคเอดส์ผัดติดมา     
พากันกินสุราไปเทียวบาร์หาเซื้อ    เสียทั่งเงิน เสียทั่งหน้า
 เสียเวลาบ่กุ่มค่า  เสียเวลาเฮ็ดเวียกบ้านงานนั้นแมนบ่ทำ 
แถมเล่าซ่ำโรคเอดส์ติดตัว   ติดครอบครัวเฮือนซานลูกเมียอยู่ทางบ้าน 
ชาวอีสานเฮานี้บ่เคยมีตั้แต่ก่อน  เดียวนี้เกิดเดือดฮ้อนกันแล้วทั่วไป
เหนือและใต้ได่ยินข่าวเป็นประจำ   เพราะลืมศีลธรรมบอนพระองค์ทรงต้าน    
ในพระธรรมเพิ่นสอนซี้
        มีคาถาเว้าว่า  ธมฺโม หเว รกฺขติ ธมฺมจารี   
ธรรมฮักษาชาวบ้านไทยอีสานเขตด่าน
ธรรมฮักษาหมู่บ้านอีสานสิ้นคู่สุคน แท้แหล้ว...  ธมฺมจารี สุขํ เสติ  
ชาวอีสานทุกบ้านผู้ตั้งอยู่ในธรรม
ธรรมสินำความสุข อีสานชาวบ้าน  ธรรมสิบัดดาลให่ไทยอีสานทุกท่าน
 สุขสำราญประเสริฐล้ำธรรมสิยู้สู่อีสาน แท้แหล้ว               

ไม่มีความคิดเห็น:

แสดงความคิดเห็น